Cyclone Remal-in hmarchhakah chhiatna tam tak thlen

Cyclone Remal chuan hmarchhak state hrang hrang tuamin, chhiatna a thlen nasa hle. Thlipui pai tel, ruah surin hmarchhak state pasarih chu ni hnih chhung a la tuam dawn nia sawi a ni a, Meghalaya leh Assam-ah thlipui hi a thawk na bik dawn a ni.

Assam :

Assam chuan ruah sur nasa leh thlipui tleh avangin chhiatna tam tak a tawk a, Haflong leh Silchar inkalpawhna kawngpui, Dima Hasao district chhunga mi chu tui lianin a lak avangin kal tlang theih a ni lo. Dima Hasao Deputy Commissioner chuan Haflong-Silchar inkar kawng chu June 1 thleng khar a nih tur thu a puang. Cachar Deputy Commissioner office chu thlipui thawkin a tichhia a, conference hall chung chu thli chuan a la a, tuiin hall chu a chim bawk a ni.

Thlipui tleh hian Assam-ah chhiatna tam tak a thlen a, Morigaon district chhunga Dighalbari-ah thingkung tluin e-rickshaw a delh avangin zirlai pakhatin nunna a chân bakah midang pathumin hliam an tuar. Thing tlu hian Samuguri, Nagaon district-a college hostel building a delh bawk a, hostel a awm an awm loh avangin thi leh hliam erawh an awm lo. Dhekiajuli, Sonitpur district-ah thing tluin school bus a delh avangin zirlai naupang pakua leh zirtirtu pakhatin hliam an tuar bawk.

Cyclone Remal chhiatna ken tel vang hian Bokakhat-ah thing tlu leh leiminin lirthei che vel a tihbuai bakah êng an nei lo bawk. Karimganj-ah chuan khaw chhungah tui lian avangin harsatna an tawk a, in tam tak tui lian hian chimin nunphung a tikhaihlak hle. Karimganj district chhungah nimin leh vawiin atan Assam sorkar chuan sikul chawlh a puang a ni.

Thlipui leh ruah surin chhiatna a thlen hrang hrang avangin Assam-ah hian nimin tlai dar 3 thleng khan mi pakhatin nunna chânin mi 13-in hliam an tuar.

Meghalaya :

State Disater Management Authority (SDMA) executive director, M War chuan nimin khan thuchhuah siamin, May 26 hnuah khuarel chhiatna avangin an state chhungah mi pakhatin nunna a chân tawh thu leh, hliam tuar pali an awm thu a tarlang.

Sutnga Weilong, East Jaintia Hills district-ah leimin avangin mi pakhatin nunna a chân bakah midang pahnihin hliam an tuar a, in tam tak leimin hian a hnawl bawk. Nimin zing khan Mawkynroh Bypass, Mawlai C&RD huam chhungah vek leimin avangin mi paliin hliam an tuar ve bawk.

JN stadium, Polo, Shillong-ah eng chhitna tower pakhat thlipuiin a chhem thlu a, hemi bakah hian East Khasi Hill district huam chhungah thing tlu leh leimin tenau avangin kawng ping a awm nual tih tarlan a ni. Thlipui tleh hian Mawten khua leh Dombah khuaah in pakhat ve ve a len chhia. Sonapur tunnel, Barak-Guwahati national highway-a mi chu chirh tawlhin a hnawh khat vek a, lirthei eng chi mah a kaltlang thei lo a, thuneitute chuan helai kawng zawh tumte chu a helna kawng dang zawng turin an hriattir.

Meghalaya sorkar chuan thlipui tleh avang hian East Khasi Hills district huam chhunga sikul tan nimin khan chawlh a puang. Meghalaya chief minister Conrad Sangma chuan district thuneitute chu inring renga awm tura chahin, chhiatna thlengah a rang thei ang bera che chhuak thei tura inpeih turin a chah a ni.

Tripura :

Cyclone Remal ken tel ruah sur vangin Tripura chhungah ruah tam tak a sur a, kum 67 hnua ni khat chhunga ruah a sur hnem ber ṭum an tawng a ni. State Disaster Management Authority (SDMA) chuan darkar 24 chhungin ruah 200 mm a tla hman tih an tarlang.

SDMA official pakhat chuan Cyclone Remal hian Tripura a kal pel tawh tih nimin khan tarlangin, ruah erawh tam vak loin a la sur chhunzawm dawn tih a sawi thung. Cyclone avang hian chhiatna tam tak a thleng a, thing tam tak a chhem thluk bakah thir ban eng emaw zat a tlu bawk tih an tarlang. Chhiatna thleng avang hian êng a khaihlak bakah kawng eng emaw zat kaltlang theih loin a ping a ni. Thawhṭanni zan khan Tripura chhungah hian darkar khata kilometre 165-a chakin thli a tleh.

Thing tlu leh leimin avanga kawng ṭhenkhat a ping tih lohah chuan Tripura hian chhiatna nasa tak an tawng lo a, hriat theih chinah thi leh hliam an la awm lo a, in chim leh thlipuiin in a chhem tluk sawi tur a la awm lo. Disaster Management team, SDRF, Aapda Mitra leh Civil Defence Volunteers-te chu chhiatna thlenna hmunah a ṭul apiang ti tura tirh luh an ni.

Manipur :

Imphal leh Jiribam inkar kawngpuiah chirh tawlhin truck pakhat kawng thlangah a hnawl bakah kawng a hnawh phui bawk a, mahse, thi leh hliam erawh an awm lo. Manipur chhungah ni hnih chung ruah sur avangin leimin leh chirh tawlh hmun tam takah a thleng a, khualzin tangkhang an tam hle. Imphal East leh West district inkalpawhna bakah Kangpokpi leh Senapati district hmun tam takah tui lian avangin harsatna an tawk bawk. Khuarel chhiatna avangin harsatna tawk mah se, thi leh hliam erawh hriat theih chinah an la awm lo tih tarlan a ni.

Arunachal Pradesh :

Arunachal pawhin ruah sur tam avangin harsatna an tawk a, Kurung Kumey district-a Joram leh Koloriang inkar kawngah leimin eng emaw zat awmin zin veivakte'n harsatna an tawk a ni. Thuneitute chuan kawng a tlang thuai theih nan kawng then hna an thawk nghal a, mahse, khua a la chhiat chhunzawm reng avangin an duh angin hna an thawk thei lo tih an sawi. Helai kawng zawh tumte tan fimkhur tura hriattirna tihchhuah a ni. Leiminin chhiatna a thlen avang hian thi leh hliam erawh an awm lo thung.