Cyclone Remal vangin chhiatna thlen belh

Hmarchhak state hrang hrangah Cyclone Remal chuan chhiatna nasa tak thlenin, chhiatna thlengte hriat belh zel a ni. Hetih lai hian chhiat tawkte ṭanpui leh chhawmdawl hna pawh ngawrh taka thawh mek a ni bawk.

Tripura : Mi 2,505 sawn chhuak

Tripura chhungah Cyclone Remal avangin chhiatna tam tak a thleng a, chenna in 573 chhiain, mi 2,505 chuang chu chhawmdawlna in lamah sawn chhuah an ni.

State Emergency Operation Centre tarlan danin, West district-ah in chhia tam berin Khowai leh Gomati district in an dawt a ni. Agartala khaw chhunga luang, Howrah lui chim chin sang zel chuan hlauhawm chin a thlen tawh avangin lui hnaiha chengte chu chhawmdawlna in lamah sawn chhuah an ni.

Tripura chief minister, Dr. Manik Saha chuan chhiat tawkte ṭanpui kawngah sorkarin hma a la reng tih sawiin, chhiatna nasa zawk a thlen belh loh nan ṭan an la tih a sawi. CM Saha hian chhawmdawlna inte tlawhin an mamawhte a ensak.

Nagaland : Mi paliin nunna an chân

Nagaland-ah Cyclone Remal-in a ken tel ruah surin chhiatna a thlenah mi paliin nunna an chân bakah chenna in 40 chuang a chhe bawk.

Khuarel chhiatna thleng avanga boral mi pali zinga pakhat chu leiminin a chilh vanga nunna chân niin, a bak pathumte erawh tui tla an ni thung. Nagaland State Disaster Management Authority (NSDMA) chuan state chhung hmun hrang hrangah Cyclone Remal leh a ken tel ruah sur avanga in leh lo chân an awm tih a tarlang a, National Disaster Response Force (NDRF) pawh chhanchhuah hna thawk tura tirh an ni tawh. Tui tla zawn nan tuihnuaiah drone hman a ni tih NSDMA official chuan tarlangin, Phek district-a Kikruma khuaah chirh tawlh a awm tih an sawi tel bawk.

Viswema leh Jakhama inkara lei (bridge) chu tui lianin a tichhe nual a, lirthei lian tan kal theih loh a ni tih hriattirna chhuah a ni. LMV leh lirthei dang, he lai kawng paltlang tumte pawh thu leh awm hma chu kawng dang zawh tura hriattir an ni bawk. Cyclone Remal zuih ral lam hmarchhak hawi zawnga a kal avangin Nagaland-ah hian June 1 thleng ruah a la sur dawn tih NSDMA chuan an tarlang.

Assam : Lumding leh Silchar inkar rel kawng a chhia

Ruah sur a tam avangin Dima Hasao district chhungah tuilian, lei min, eng khaihlak leh kalkawng ping a tam hle a, Lumding leh Silchar inkar rel kawng pawh tuilian leh lei tawlh vangin rel a tlan thei rih lo a, khualzin phurtu rel pathum chu kawngah an tangkhang mek a ni.

Assam chief minister Himanta Biswa Sarma chuan ruah sur kara êng an neih theih nana che chhuak power department hnuaia thawktute chungah lawmthu sawiin Guwahati leh state chhung hmun dangah rang takin êng an nei leh thei tih a sawi.

Manipur : May 31 thleng sikul chawlh puang

State chhungah cyclone Remal vanga chhiatna hrang hrang a thlen avang leh tui lian leh ruah sur a la tam dawn avangin Manipur sorkar chuan May 31, Zirtawpni thleng sikul chawlh a puang. Sorkar thuchhuah chuan district hrang hrangah tuilian avangin harsatna an tawk tih tarlangin, zirlai naupang him nan sikul chawlh hi an puang ta a ni. Sikul chawlh a nih chhung hian admission leh entrance test neih loh tur a ni tih sorkar chuan a puang bawk.