Meghalaya : Ruihhlo do kawnga hma latu VDPs thuam chak dawn

Meghalaya chhungah ruihhlo, a bikin damdawi leh a kaihhnawih hrang hrang hluar zel do nan Meghalaya sorkar chuan state chhung hmun tam zawkah Village Defence Parties (VDPs) dah belh turin thutlukna a siam.

Social welfare minister Paul Lyngdoh leh sorkar thuneitu dang ṭhu khawm chuan ruihhlo do kawnga hma an sawn theih nan he thutlukna hi an siam a ni. VDPs chu thuam chak bakah a thara hmalakna kalpui an ngai tih Lyngdoh chuan sawiin, ruihhlo hluarna laiah VDPs tam zawk dah an ngai tih a sawi bawk. Ruihhlo leh a kaihhnawih hrang hrang tihrem a nih theih nan khawtlang puihna an mamawh tih a sawi bawk.

Lyngdoh chuan ruihhlo do kawnga hma latute'n harsatna an tawk ṭhin tih tarlangin, dorbar shnongs pawhin ruihhlo zuar emaw, kawl emaw police hnena hriattir kawngah harsatna an tawk ṭhin tih tarlangin, VDPs thuam chak a nih chuan community policing hmangin he harsatna hi sutkian an inbeisei tih a sawi. De-addiction center ngaisak lo leh ruihhlo do kawngah sorkarin hma an la ṭha tawk lo nia sawi chu thu dik lo a ni tih Social Welfare Minister chuan sawiin , sorkar chuan heng hmalaknate hi a ngaihsak hle tih a sawi.

VDPs hian ruihhlo do bakah dan leh hrai kenkawh kawngah police an pui ṭhin dawn a, hei bakah hian khawtlang duh loh zawng thil dang a rem theih nan hma an la dawn tih tarlan a ni bawk.