Assam tual ṭo party-te kan thawhho a ngai : Akhil Gogoi

Raijor Dal dintu leh Sivasagar MLA ni bawk, Akhil Gogoi chuan Assam chhunga tual ṭo party dangte chu thawhpuiah sawmin, tual ṭo party inlungrual tak pakhat Assam chuan a mamawh a ni, a ti.

Akhil Gogoi chuan Assam chhunga tual ṭo party zawng zawngte chu inzawm khawma, tual ṭo party pakhat din a ṭul thu sawiin, a party din Raijor Dal chuan din a nih tirh aṭangin chumi chu an tum ber a ni tih a sawi. Tun dinhmunah inzawm khawm an duhna chu la hlawhtling lo mah se, hma lam hunah a hlawhtlin theih nan hma an lak zel tur thu a sawi bawk. Tual ṭo party 10 aṭanga 15 chu an ral dawn tih a sawi a, Assam tana chak zawka hma an lak theih nan inzawm khawm a ngai a ni, tiin a sawi.

Gogoi chuan tribal leh khawtlang huap pawl hrang hrang chu an pawimawh tih sawiin, tualṭo party an inzawm khawm hunah pawh telh ve ni se a duh thu a sawi. Mimal hamṭhatna leh hmasial vangin an tum hi a hlawhtling lo thei tih Gogoi chuan a pawm a, hetiang ti duh an awm a nih chuan Assam tan thil lungchhiatthlak tak a ni dawn tih a sawi bawk. Assam Jatiya Parishad hotu, Lurinjyoti Gogoi chuan inzawm khawm em duh lo mah se, tual ṭo party-te tan common platform neih erawh a duh tih a lo sawi ve tawh bawk.