Tripura-a BJP MLA ṭhenkhatin hruaitu thlak duh

Tripura-a rorellai, BJP MLA zinga ṭhenkhat chu lungawi loin New Delhi-ah an awm mek a, BJP national president JP Nadda hmuin, party hruaitu thlak tura ngen an tum. 

MLA lungawi lo zingah hian BJP state vice president Ram Prasad Paul pawh a tel a ni. Inrinni liam ta khan Paul chuan BJP general secretary BL Santosh hmuin, an state-a an party chhung boruakte a hrilhfiah.

Paul chuan, "Party MLA eng emaw zatin hming an ziah hnanna, Tripura-a BJP hruaitu thlak tura ngenna pawh kan thehlut tawh a ni," a ti. An party MLA zingah pathum/pali tih loh chuan hruaitu thlak an duh vek niin a sawi bawk. 

Tripura-ah hian rorellai BJP hian member 60 awmna Assembly-ah MLA 36 a nei mek a, a thawhpui IPFt chuan MLA pariat neiin, eptu party CPI(M) chuan 16 a nei a ni. 

MLA lungawi lote chuan hruaitu thlak an duh avangin BJP-ah an lungawi lo tihna a ni lo tih sawiin, party tan rinawm takin an awm zel dawn tih an sawi. State BJP hotu ni mek chuan an party worker chauh ni lo, state mipuite beiseina a tihchhiatsak tawh nia sawiin, hei vang hian hruaitu thlak an duh tih an sawi.