Assam Congress-in party MLA hnawtchhuak

Assam Congress chuan an party hruaitu hlun, MLA ṭanglai leh MLA hlui pakhat chu party duhdan kalha che a,  BJP thurualpuiah puhin kum ruk chhung atan an party aṭangin an hnawtchhuak. 

Party aṭanga hnawhchhuahte hi Barak Valley MLA Rajdeep Gowala bakah MLA hlui Rumi Nath-te an ni. Party aṭanga hnawhchhuah an nih hi AICC interim president Sonia Gandhi leh APCC President Ripun Bora-te pawhin an pawmpui tawh bawk. 

BJP hruaitu leh Assam health minister Himanta Biswa Sarma chuan an state-a Rajya Sabha inthlan neih dawn khan, Rajdeep Gowala leh Congress MLA ṭhenkhat chuan BJP an zawm dawn niin a lo sawi tawh a ni.  

Rumi Nath hi kum 2006 khan Borkholi constituency-ah BJP ticket-in thlan tlin a ni a, a hnuah Congress party a zawm. Kum 2011 assembly inthlanah khan Congress candidate-a thlan tlin a ni.