Manipur-in ruahsur nasa vangin harsatna tawk mek

Tunhnaia ruah nasa tak sur avangin Manipur chuan harsatna hrang hrang a tawk mek. Ruah sur vang hian hmun tam takah lei a min a, hmun ṭhenkhat chu tlawhpawh theih lohin a awm mek. Manipur hill district leh Tamenglong district-a kawngpui ṭhenkhat chu a chhe nual a, lirthei kal tlang theih lohin a awm mek a ni.

Inkalpawhna kawngpui chhia avang hian hmun ṭhenkhatah chuan nitin mamawh lakkhawm kawngah harsatna an tawk ṭan a, lirthei tangkhang eng emaw zat a awm bawk. Border Road Organisation leh Public Works Department te chuan kawngpui thenfai leh siam ṭhat hna hi an thawk mek a, National leh State highway eng emaw zat chu tun thlengin kaltlang theih a la ni lo.

Ruah hi a la sur chhunzawm reng avangin leimin nasa zawk a thlen leh mai pawh a hlauhawm hle a, tunah hian mamawh lakluhna ber kawngpui pawimawh tak NH 37 Assam-Mainmpur pawh leimin hian a hnawhping bawk. Ruah sur nasa vang hian hmun eng emaw zat chu tui lian tuar thei mai dinhmunah an awm ve mek bawk a, Bishunupur district-a tuikhuah eng emaw zat chu a chim tawh a ni. Thoubal district-ah pawh tuilian chuan mihring chenna hmun te chu a chim chho mek a, Thoubal lui chuan hlauhawm chhinchiahna a pel chho tawh bawk. Imphal-ah chuan heng harsatna hrang hrang te avang hian school leh sumdawnna hmun eng emaw zat chu khar a ngai hial a ni.

Thuneitute chuan ruah a sur zel chuan Nagaland-Manipur Natiaonal Highway 2 pawh lirthei kal tlang theih loha a pin mai a hlauhawm niin an sawi bawk. Heng harsatna hrang hrang avang hian oil leh nitin mamawhah harsatna an tawk chho mek a, thuneitute chuan mipui te chu chiai lo turin an hraittir bawk.

Cyclone Roanu vangin nuna chan pahnih awm :

Cyclone Roanu chuan hmarchhak state Tripura, Mizoram leh Manipur bakah Southern Assam te chu a nuai a, hmun hrang hrangah chhiatna a thlen. Cylone Roanu hi Bangladesh-ah a thawk a, hemi hnu hian hmarchhak hmun
ṭhenkhat a nuai ve leh a ni.

Cyclone Roanu avang hian naupang pahnihin nunna an chan bakah mi eng emaw zatin hliam an tuar tih hriat a ni tawh. Naupang pahnih thi te hi kum kaw mi leh kum 12 mi an ni a, Amarpur leh Rajnagar Tripura-a cheng an ni a, an chenna in thliin a nuai chhiat avangin vanduaina hi an tawk ta a ni. Northern Tripura-ah chuan chhungkaw 200 chuang zet te chu Cyclone Roanu hian a nuai chhia a, hmunhim lamah mi tam tak thiarchhuah an ni bawk.

Cyclone Roanu hian ruah a ken tel vangin hmun hrang hrangah leimin nasa tak a thleng a, NH 2, NH 44 leh NH 37 chu lirthei kaltlang theih lohin a awm mek. Cyclone Roanu hi darkar khata km 45-a chakin a tleh a, thing, thir ban bakah thlai chinna hmun eng emaw zat chu a nuai chhia a ni.