Chakloh chhanah mawhpuh tur awm lo - Gogoi

Assam Chief Minister Tarun Gogoi chuan election result puan a nih hnuah, Assam mipuite sukthlek chu an pawm thiam a ṭul tih sawiin, an chak loh chhanah mawhpuh tur an awm lo tih sawiin, an party chet chhiatna chu an tluk hlenna tur a nih loh tih a sawi.

Tarun Gogoi chuan, "Kum 15 zet thu neihna kan chang tawh a, tunah erawh opposition-a kan awm hun a thleng ve ta a ni", a ti a, an chak lohna chu a pawm thiam hle.

Gogoi chuan thuthar thehdarhtute hmaah thu sawiin, a zawna term li sorkarna siam chu thil harsa tak a ni, a ti. Chief Minister thar tur Sarba-nanda Sonowal chu a lawmpui thu sawiin, an party hlawhtlinna-ah duhsakna a hlan . Congress hruaitu hlun Anil Raza chuan, an chak lohna chu a pawm tih sawiin, insiam ṭhatnan kan hmang dawn a ni a ti a, an party-ah mipuite chuan rinna an la nghat niin a sawi bawk. An party chak loh chhanah hruaitute demna tur a awm lo niin Raza chuan a sawi ve bawk.

Congress thupuangtu Kishore Bhattacharya chuan an chak loh chhanah chuan candidate te dinna bial siam rem chuan nasa takin nghawng a nei niin a sawi a, BJP leh a thawhpui party te thawhhona ṭha chu an tuar niin a sawi bawk. Assam Pradesh Congress Committee (APCC) chuan an chakloh chhanah mawhpuh tur a awm lo tih thuchhuah siamin an tarlang a, ṭha zawka sorkar siam tura thawhchhuak turin theihtawpin hma kan leh nghal dawn a ni anti. APCC vice president leh Rajya Sabha MP ni bawk Ripun Bora pawhin opposition-a an awm tur zirlai pawimawh tak a nih tur thu sawiin, theih tawp chhuaha mipui tana an din zel tur thu a sawi a ni.