Ramri kan ngaipawimawh dawn : Sonowal

Assam-a sorkarna thar siam tur BJP chuan an hmaklakna tur ṭhenkhat te an tarlang a, ramri venhim chu an ngaihpawimawh tur zingah a tel.

Chief Minister tur Sarbananda Sonowal chuan nimin khan an party hmachhawp te chu sawichhuakin Bangladesh Border chu kum hnih chhunga chinfel a nih tur thu leh National Register of Citizens (NRC)-ah ram leilung fate dik tak chauh hming a chuan theih nana hma an lak tur thu a sawi.

Sonowal chuan," Assam mipuite hmaa kan lo tiam tawh ang ngeiin, Bangladesh aṭanga dan loa Assam-a lutte titawp turin hma kan la dawn a ni" a ti. Indo-Bangladesh border hian sawi a hlawh hle a, inthlan neih a nih hma aṭang hauhin Congress leh BJP te chuan inbeih nan an hmang a ni. Bangladesh atang hian dan loa Assam-a lut eng emaw zat te chu NRC-ah an hming a chuang nia hriat a nih avangin, sorkar laipui pawhin state sorkar chu fimkhur taka kalpui turin alo hriattir tawh nghe nghe a ni.

Sonowal chuan then-awm ram Bangladeh
aṭanga dan loa an state-a lut ṭhin te titawp tur hian an sorkar chuan chak takin hma a la dawn tih a sawi. Indo-Bangladesh border thui zawng hi km 4,096 zet a ni a, chung zinga km 263 chu Assam state huam chhunga awm a ni.