Assam Assembly tharah hmeichhe MLA tlem

Assam Legislative Assembly member turin hmeichhe candidate zingah pariat chiah thlan tlin an ni a, House hmasa aiin hmeichhe MLA hi parukin an tlem dawn a ni.

Member 126 awmna, Assam Assembly thara hmeichhe MLA awm zat hi 5.35% chiah a ni pha dawn. Assembly hmasa khan hmeichhe MLA hi 14 awmin, 11.1% an tling a ni.

Hetihlai hian assembly inthlan neih zawh takah hian ṭum dang aiin hmeichhe vote thlak an ṭha a, hmeichhe vote nei mi 92,09,928 awmin an zinga 84.81% in vote an thlak a ni.

Hmeichhe candidate 16 neitu, Congress party chuan hmeichhe MLA pathum neiin, party mala hmeichhe MLA ngah ber a ni. Hetihlai hian MLA ni chunga inthlan chuhtute leh minister kalchhuak tur pahnih,Bismita Gogoi-i leh Sumitra Patir-i te chu an chak zo lo vek.

BJP chuan hmeichhiate tan ticket paruk pein, an zinga pahnih chu MLA atan thlan tlin a ni. BPF chuan an party hmeichhe MLA nila pahnihte chu din tir lehin an chak leh ve ve bawk.

AGP chuan Assembly hmasaah hmeichhe MLA a nei lo a, tun ṭumah hian Deputy Speaker hlui Renupama Rajkhowa a nei thar dawn thung a ni.

Kumin assembly inthlanah hian party hrang hrangte hian ṭum dang aiin hmeichhe candidate an siam tlem vek a ni.