Manipura-ah JCILP ten nawrh titawp

Manipur Assembly-in Bill pathum a pass tawh 'The Protection of Manipur Peoples Bill, Manipur Land Revenue & Land Reforms (7th Amendment) Bill leh Manipur Shops and Establishment (2nd Amendment) Bill duh loh lantir nana darkar 38 awh nawrh huaihawt a nih avangin police leh mipuite inkarah buaina tenau a chhuak a, mipuite chu tear gas hmanga hnawh darh an ni.

Joint Committee on Inner Line Permit System (JCILPS) te chuan nawrh an kalpui chu Inrinni tlai dar 6 khan tihtawp lailawk a nih thu an sawi.

Manipur Chief Minister Okram Ibobi Singh chuan Inrinni khan Manipur Assembly-in kum 2015 August 31-a Bill pathum a lo pass tawh dodalna nasa tak awm chungchangah an state-a political party zawng zawng te chu sorkar laipuia thuneitute dawr tura a sawm thu a sawi. Manipur-ah hian Inrinni khan Anti-Terrorism Day hman a ni a, he hunah hian CM chuan thu sawiin, Bill pathum chungchang hi Prime Minister Narendra Modi bakah Home Minister te chu sawipui an ni ang, a ti.

May 9 khan Manipur-a political party hrang hrang te chuan meeting an lo nei tawh a, Manipur Assembly-in Bill pathum a pass tawh tun thlenga tih khawtlai a la nih chungchang hian sorkar laipuia thuneitute dawr an lo rel tawh a ni. Mahse hei hi a bik takin Manipura Tribal te chuan an duh lo hle a, Bill chu sut leh turin kawng hrang hrangin sorkar an kar mek a, vawi tam tak nawrh huaihawt a nih tawh a, duh lohna lantirtute zinga hian mi eng emaw zat chuan nunna an chan tawh nghe nghe a ni.

JCILPS-ten darkar 42 awh nawrh an huaihawt vang hian hmun hrang hrangah nunphung a buai hle a, mahse nawrh hi darkar 38 hnuah tihtawp lailawk a ni ta a ni. Manipur khawpui Imphal-ah chuan lirthei che vel hmuh tur a awm meuh lo a, nawrhna kalpui a nih chhung hian dawr leh sumdawnna hmun te chu khar vek a ni bawk.