Vawiin-ah Assam-ah sorkar thar la lut dawn

Assam State Election result chu May 19 khan puan a ni a, Congress sorkar chu paih thlak niin hmarchhak-a a hmasa ber ni turin vawiin hian Assam-ah BJP leh a thawhpui ṭangrual sorkar chu lawmluh a ni dawn ta.

Prime Minister Narendra Modi chuan vawiin-a Assam state sorkar thar lawmluhna neih turah a tel tur thu a sawi.

Sorkar thar lawmluhna neih turah hian venhimna khauh taka kalpui a ni dawn a, state police bakah central agency te chu duty tura tih an ni. Lawmluhna inkhawm hi Khanapara Veterinary College playground-ah neih a ni dawn a, hun hman zawh hnuah public meeting neih a ni dawn a, he hunah hian PM Narendra Modi chuan thu a sawi dawn a ni.

Prime Minister Narendra Modi bakah hian BJP president Amit Shah leh sorkar laipuia Minister te, NDA sorkarna hrang hrang state Chief Minister te, hmarchhak state Chief Minister te leh ṭhenawm ram hruaitu Baba Ramdev leh Shri Shri Ravi Shankar te chu tel tura beisei an ni. Venhimna hna thawktu tur hi mi nuai chuang zet an ni a, mipui ṭhutna tur seat 20,000 siam a ni bawk. CCTV camera
ṭhahnem tawk tak dah a ni bawk.

Sorkar thar lawmluhna inkhawm hi tlai dar thumah ṭan a ni dawn a, MLA thlan thar te chu rinawmna thu tiamtira lakluh an nih hnuah BJP party headquarters-ah meeting an nei nghal ang. He meeting hi MP Bijoya Chakravarty, Ramen Deka leh RP Sharma te chuan an telpui dawn a ni. BJP chief ministerial candidate Sarbananda Sonowal leh senior leader Himanta Biswa Sarma te chuan ministry thara lawmluh a nih hma hian New Delhi-ah paty hruaitu lute an hmu a ni.

Sarbananda Sonowal chuan Assam Governor PB Acharya chu Pathianni khan Raj Bhavan-ah a hmu a, Asom Gana Parishad (AGP) leh Bodoland People’s Front (BPF) te nena sorkar thar an din tur chungcahng an sawi. Sonowal hi BJP hrauitu lawk BJP National general secretary Ram Madhav leh senior BJP hruaitu Himanta Biswa Sarma te chuan an
ṭawiawm a, anni bakah hian AGP hruaitu Keshav Mahanta leh BPF president Hagrama Mohilary te chu an tel ve bawk. Governor chuan Sonowal chu sorkar chak tak din turin duhsakna a hlan a, a thawhpui party te nena thawhhona ṭha nei zel turin a duh tih a hrilh.

Governor hian rawtna hrang hrang siamin Sonowal-a kaih-hruai sorkar thar ding tur chuan National Register of Citizens (NRC) kalpui mek chu fimkhur taka vil turin a duh tih a sawi a, hei hi state tan mai ni lo ram leh hnam tana thil pawimawh a ni, a ti. Ramri venhim kawngah chak taka hma la tura a duh thu sawiin, ṭhenawm ram Bangladesh
aṭanga dan loa lut ṭhin te titawp tura hma la nghal turin a ngen bawk. Tribal leh non-tribal te inkarah inlaichinna ṭha zawk a awm theih nana hma la turtein a ngen bawk a ni. Governor meeting an neihpui zawh hnu hian Sonowal hian Chief Minister kal chhuak tur Tarun Gogoi chu a chenna Koinadhara-ah a hmu leh a, sorkar thar lawm luhna inkhawm hmanpui turin a sawm a ni.