Nagaland SSA Teacher ten hlawh lak beisei

Nagaland Chief Secre­tary leh Finance Commi­ssioner te chuan Sarva Shik­sha Abhiyan (SSA) hnuaia zirtirtute chu state sorkar sum dinhmun a ṭhat chho avangin kum danga harsatna an lo tawh ṭhin te chu a ziaawm tawh dawn niin an sawi.

SSA hnuai thawk zirtirtute hlawh hi sorkar laipuiin 90% a tum a, state sorkar chuan 10% a tum ve bawk. State-in sum leh paiah harsatna a tawh avangin Nagaland-a SSA zirtirtute chuan hlawh hun rei tak chhung an la thei lo a, lungawilohna an lantir fo bawk. Sorkar thu neitute hian sorkar laipui aṭanga sum a hun taka an hmuh chuan zirtirtute hlawh hi a hun takah pek chhuah theih an inbeisei thu an sawi a ni.

Hemi chungchangah hian sorkar aiawh leh Nagaland Sarva Shiksha Abhiyan Teachers’ Association (NSSATA), RMSA Asso­ciation, Aggrieved Hindi Teachers’ Association leh Chief Secretary Pankaj Kumar te chuan May 16 khan joint meeting an nei a ni. Chief Secretary, Commissioner & Secretary (School Education) chuan SSA zirtirtute kum 2010 leh 2013-a lak te chu state regular employee an ni, a ti. Chief Secretary chuan a hun takah hlawh lak a nih theih nan a buaipuitute chuan ngawrh takin an bei mek a ni, a ti bawk.

Meeting hi Chief Secre­tary conference hall-ah neih a ni a, Naga Students’ Federation (NSF), Additional Directors of School Educa­tion, Director SMA (SSA), Direc­tor RMSA leh mi pawi­mawh dangte an tel a ni.