AP CM-in Sarbananda Sonowal lawmpui

Arunachal Pradesh Chief Minister Kalikho Pul chuan Assam election-a hnehna chang BJP leh a thawhpuite chu lawmpuina hlanin, chief minister thar tur Sarbananda Sonowal chu thinlung taka a lawmpui thu a thawn. Pul chuan remna leh muanna a awm zel theih nan leh hmasawnna chak zawka kalpui zel a nih theih nan Sarbananda Sonowal chu duhsakna a hlan tih a sawi.

AP CM chuan,"Inthlan campaign boruak thlirin BJP-in chiang taka hnehna a chang chu a mak lo a, mipuiten Congress sorkar paihthlak an duh tih chiang takin a lang a ni" a ti. Prime Minister Narendra Modi chuan hnehna an chan theih nan hian a thawh hlawk hle niin a sawi ve bawk a, hmarchhak hmasawnna ngai pawimawhtu a ni, a ti bawk. Pul hian Hemanta Biswa Sarma bakah Asom Gana Parishad (AGP), Bodoland People’s Front (BPF) party te chu a lawmpui thu a sawi bawk. BJP leh a thawhpui party te chuan sorkar chak tak an din theih ngei a rin thu sawiin, Assam tan chauh ni lo hmarchhak tan kawng tam takah hmasawnna hmuh theih a ṭhan a rin thu a sawi.

Kalikho Pul chuan, Assam leh Arunachal Pra-desh chuan kawng tam takah inzawmna thuk zawk an neih thei tur thu sawiin, kawng hrang hranga thawh dun puiah Sonowal chu a sawm nghal bawk. BJP vice president Techi Necha pawhin hnenhna an chang chu hmarchhak tan kawng hrang hrangah a ṭangkai dawn niin a sawi ve bawk.