BJP-in Manipur lam a hawi

Bharatiya Janata Party (BJP) chu Assam election neih zawh takah an chet ṭhat avangin an phur hle a, Imphal Municipal Corporation election June 2-a neih leh turah hnehna chan leh ngei an inbeisei hle.

Manipur Municipal Corporation election lo awm turah hian BJP chuan seat 27 awmah candidate 26 an nei. Congress leh BJP te chu inbei tawk viau turah ngaih an ni a, candidate pawh an ngah ber a ni. BJP hi Assam-ah hnehna chang hlim an ni a, fiahna dang an hmachhawn lehna hmasa ber tur a ni ang.

State Bharatiya Janata Party (BJP) president Khetrimayum Bhabananda chuan,"Hnehna kan chang ngei dawn a, mipuite thlawpna kan hmuh ṭhat bakah Prime Minister Narendra Modi chuan hnehna kan chan theih nan theihtawp a chhuah a ni" a ti. State Congress president T.N. Haokip chuan Bhabananda thusawi hi a pawmpui lo hle thung a, Congress sorkarin kum 15 chhunga a hna thawh
ṭhat hrang hrang leh hmasawnna awm te chu mipuite hian an hmuh hmaih lo a ni, a ti ve thung. Assam-a BJP chet ṭhat chuan an state-ah nghawng a neih a rin loh thu Haokip chuan a sawi bawk.

Imphal Municipal Corporation election neih turah hian vote nei zingah ram leilung fa ni lo hming enge maw zat a awm tih hriat a ni, vote nei zawng zawng hi 175,864 an awm a ni. Kar kalta Zirtawpni khan candidate te inhnuhdawh theih hun a tawp a, chuh tuma hming pe lut 86 zet te chu an inhnuk dawk leh a ni. BJP chuan rorellai Congress chu kawng hrang hrangin a bei leh mek a, sorkar chu eirukna laka fihlim lo niin a puh.