Manipur-a inlambunna-ah mi parukin nunna chan

Indian Army te chu Pathianni khan Manipur-a hel tu tih hriat loh te chuan an lambun a, Assam Rifles mi leh sa parukin nunna an chan. Thi zingah hian junior commissioned officer (JCO) telin, inlambunna hi Imphal aṭanga km 190 vela hla Chandel district-a thleng a ni.

Jawans 29 Paramilitary battalion te hi Chandel district-a Hangshing thingtlang khuaah chawhnu dar khat velah beih an ni. Army official chuan, Assam Rifles te hi Chandel district hmun hrang hranga leiminna hmun tlawha kal te an ni a, an haw lam hi hel te hian an lo lambun ta a ni, a ti. Hel te nen hian an inkap zuia inkahna hmunah hian Junior Commissioned Officer pakhat leh midang panga te chuan nunna an chan a ni. Khua a chhiat avangin chet a harsa a, hel te hian ramngaw aṭangin lo beiin, darkar khat vel an inkap a ni. Helho hian INSAS rifle pakat, AK rifle pali leh light machine gun te an tlanchhiatsan a ni.

Inlambunna thlenna hmun hi Paraolon bul hnai a ni a, he lai hmunah hian kum 2015 June 4 khan 6 Dogra Regiment 18 zet chu thah an lo ni tawh a ni. Eng pawl mahin he thil hi an tih niin an la inchhal lo a, Manipur-a hel inzawmkhawm pawl pakhat CorCom te chu an inrawlh nia hriat a ni.