Manipur-in EU aṭangin ṭanpuina an dawng lo tih an sawi

Manipur chuan thlipui tleh leh ruah sur nasa avanga chhiatna an tawh chhawmdawl nana European Union (EU) hnen aṭanga ṭanpuina sum Euro 2,50,000 (Rs vbc 2.25) dawng anga thuthang chu thu dik lo a ni tih an tarlang.

Manipur Chief Secretary, DR Vineet Joshi chuan tun hnaia chhiatna an tawh avanga sum an mamawh chu National Disaster Response Fund leh State Disaster Response Fund aṭanga pek a ni tih tarlangin, chhawmdawl hna thawh pawh district tina Deputy Commissioner-te chuan anmahni district huam chhungah ṭheuh a ṭul anga kalpuiin, security forces leh mipui tlawmngaite nen ṭangkawpin hma an la tih a tarlang tel bawk. State sorkar chuan chhiat tawk district hrang hrang tan Rs. vbc. 30 a pe chhuak tawh a ni.

Ruah sur nasa avanga tui lian tuar mek, Manipur-ah hian chhiatna a thlen belh zel a, tui tla, leimin hnawl leh current man avangin mi pathum in nunna an chân a, tui lian vang hian mi sang chuang an chenna hmun aṭanga sawn chhuah an ni tawh bawk. Tui lian avang hian Assam paw'n harsatna a tawk a, Thawhlehni aṭanga chhiarin nunna chân mi panga an awm tawh a, mi 4,000 chuang tui lian hian nghawngin, nunphung a tikhaihlak hle a ni.