Assam-a sipai camp beitu ULFA-I hel paruk lakah NIA-in charge sheet a theh lut

National Investigation Agency (NIA) chuan Tinsukia district, Assam-a sipai camp bomb hmanga beihnaa inhnamhnawih, United Liberation Front of Asom-Independent (ULFA-I) hel paruk lakah charge sheet a theh lut. Hel paruk zingah hian ULFA-I hotupa Paresh Baruah pawh a tel.

Kakopathar, Tinsukia district-a Indian Army camp hi November 22, 2023 khan ULFA-I helpawl hian granade hmangin an bei a, thi leh hliam awm lo mah se, NIA chuan Assam chhunga venghimtute beih tumna lian zawk nen a inkungkaih niin an tarlang. Charge sheet hi NIA Special Court, Guwahati-ah theh luh niin, dan hrang hrang - Indian Penal Code, Unlawful Activities (Prevention) Act leh Explosives Substances Act hnuaiah thubuai ziah luh a ni.

ULFA-I hotu pahnih, Paresh Baruah leh Arunodoy Dohutia chu he pawikhawihna thlengah hian a bultumtu an ni tih NIA chuan a tarlang a, Abhijit Gogoi chu ruahmanna siamtu leh inbeihna kaihruaitu a ni tih an sawi bawk. Bijoy Moran chu ULFA-I helpawl zinga tel tur zawngtu niin helpawl chettlatna hmuna ṭhalaite chu helpawlah hian a la lut ṭhin a ni, NIA chuan a ti. Helpawl paruk zinga pahnih, Parag leh Bijoy chu nikum December thla khan Tinsukia district-ah man niin, midang erawh an tlanchhe hman a ni.