Tripura : State pumah êng neih ṭhat loh vangin harsatna tawk

Tripura power minister Ratan Lal Nath chuan an state chhungah êng an neih leh thuai theih nan hma la turin thawktute a chah a, thawktu indaih lohna hmunah a ṭul dan a zirin thawktu indah belh dan ngaihtuah turin Power Department hotute a chah bawk.

Tripura State Electrical Corporation (TSECL) nen Nilainia meeting an neihnaah Power Minister chuan he thu hi a sawi a, êng chungchanga an dinhmun kimchang a hriat hnuah rang taka hma la turin Power Department hotute chu a chah a ni. Nath chuan thlipui tleh hnuah kâwlphetha an neih loh avanga harsatna tawk an awm chu pawi a tih thu sawiin, êng pek chhuah vat theih duh mah se, khawl thil buaipui an nih avangin siam ṭhat hna duh angin a chak thei lo a ni, a ti. Power Minister chuan Tripura mipuite thlawpna a ngen a, êng pek chhuahna chhia siamtute tan a hnawksak zawnga khawsa lo turin mipuite chu a chah bawk.

West Tripura District Sessions and Judicial Magistrate Court-a advocate leh thawktu dangte chuan êng an neih loh avanga an lungawi lohna lantir nan kawng an dang. Senior advocate, Sandip Datta Chowdhury chuan kawng dan a ngai chu pawi an tih thu sawiin, thutlukna siam harsa tak ni mah se, ni thum chhung êng an neih loh avangin hna an thawk thei lo a, tui in turah pawh harsatna an tawk ṭan tih a sawi. An harsatna tawh chungchang TSECL thuneitute hnena thlen an tumna chuan awmzia a nei lo tih a sawi a ni.