Manipur: Tuilianin in 24,000 chuang ti chhia, mi nuai khat chuang a nghawng

Cyclone Remal avanga Manipur-a tuilian chuan mi 1,88,143 zet nunphung tibuaiin a nghawng a, tuilian hian in 24,265 a tichhe bawk niin state sorkar chuan a tarlang.

Manipur minister for water resources and relief leh disaster management, Awangbou Newmai chuan tuilian tuarte chhawmdawl nan hian relief camp 56 siam a nih thu tarlangin, mi 18,103 zet chu sawn chhuah an ni tawh tih a sawi. Newmai chuan Imphal west leh east Addl. chief secretary leh deputy commissioner te bakah, directorate of relief and disaster management te nen ṭhu khawmin tuilian dinhmun enhona leh zirhona an neih thu a sawi a, chhanchhuah hna bakah bo zawn leh ṭanpuina thawh dan turte an rel thute a tarlang bawk.

Minister chuan thlai chin sa hectare 401 zet chu tuilian hian a tihchhiat thu sawiin, Imphal East, Imphal West, Bisnupur, Noney, Churanchanpur, Senapati leh Kakching-ah te chuan ṭanpuina thawn luh tawh tih a tarlang. Tuilian avang hian mi pathum an thih tawh bakah, mi pakhat bo awmin, hliam tuar mi pakua an awm thu a sawi lang bawk. Manipur sorkar hian lui kuang min avanga tuilian denchhen hian nimin thleng khan sorkar chawlh a la puang a ni.