Assam leh Meghalaya inrinaa thihna thleng chhui hna CBI kutah hlan

Central Bureau of Investigation (CBI) chuan 2022 kuma Assam leh Meghalaya inrinaa mi paruk thihna thleng chungchang chhui chian hna chu an thawh chhunzawm tawh tur thu an sawi.

Assam leh Meghalaya inrinaah hian November 22, 2022 khan buaina chhuakin, Meghalaya mi panga leh Assam forest guard pakhat an thi a ni. A hmuna thil thlen dan hmutute sawi danin, Assam forest guard hian Meghalaya aṭanga phalna nei loa thing kih phurh luh tum an lo dan vang niin an sawi. Buaina chhuahna hmun hi Assam thlang lam, West Karbi Anglong district huam chhungah a ni a, Assam police-te chuan phalna nei loa thing phur an tihdin hnu hian Meghalaya mite chuan lung nen an bei zui niin an tarlang.

Buaina kaihhnawiha thihna thleng chungchang chhui chian hna CBI kuta hlan a nih hnu hian CBI hian Assam leh Meghalaya sorkarin thubuai an theh luh tawhte chu a theh lut ṭha ve leh a ni. He thubuai chhui zui hna hi Meghalaya chuan February thla khan CBI kutah a dah tawh a, Assam sorkar pawhin March thla khan CBI kuta a dah thu a puang ve bawk.

Assam leh Meghalaya te hian ramri thui tak an inṭawm aṭangin hmun 12 laiah buaina an nei reng a, heng zinga paruka an buaina tihtawp nan hian state pahnihte hian March 2022 khan union home minister Amit Shah hriatpuina leh telpuina hnuaiah inremna thuthlung an lo ziak tawh a ni.