Tripura : Thingpui thar leh sawngbawl danah diploma course hawng dawn

Tripura Tea Development Corporation leh Maharaja Bir Bikram University, Agartala thawkhote chuan zirna sang zawka thingpui thar dan leh sawngbawl dan chungchang zirna, diploma course leh post-graduate diploma course hawn an tum thu an puang.

Tripura Tea Development Corporation chairman, Samir Ghosh chuan thingpui sawngbawl dana diploma course chu kum khat zir tura ruahman a nih thu sawiin, an state-a thingpui huan enkawlna kawnga thawktu indaih lohna chu an hmalakna kaltlang chuan phuhruk theih ngei a nih a beisei thu a sawi bawk.

Ghosh chuan Tripura-a thingpui huan 54-te enkawl hna chu tualchhung miin thawk se a duh thu tarlangin, chutiang thiam tura tualchhung mi chher a duh thu te, chung thiamna chu Maharaja Bir Bikram university-ah diploma course hmanga zir tura buatsaih an tum thu te, theory leh practical thla ruk ve vea ṭhen an tum dante a sawi a ni.

An hmalakna kaltlang chuan hna thawh tur tam zawk an siam belh theih a beisei thu Ghosh chuan sawiin, sorkarin thingpui huana thawk tura in tin tana choba a siam kaltlanga chhungkaw 2,000 chuangin hlawkna an chhar thar thute a tarlang tel bawk.