Assam-ah tuilian avangin mi 15 an thi

Assam-in kar liam taa ruah leh thli nasa tak a dawn avanga tuilian chuan chhiatna nasa tak thlenin, nimin thleng khan tuilian avanga thi zat hi mi 15 an tling tawh. Tuilianin a nghawng, tuartu zawng zawng hi mi nuai ruk an tling bawk.

Assam State Disaster Management Authority chuan thuchhuah siamin, tuilianin a nghawng district hi 10-ah a tla thla tawh a, Inrinni khan Cachar, Hailakandi leh Karimganj district aṭanga ruang pathum chhar belhin, May 28-a thi leh ruah nasa tak thawkin tuilian a thlen avanga thi zawng zawng hi 15 an tling ta a ni. District hrang hrangah tuilian tuartu, mi 40,000 chuang chu relief camp-ah an khawsa mek bawk a ni.

Central Water Commission (CWC) chuan tuilian dinhmun hi uluk taka thlithlai chhunzawm reng a ṭul thu a puang a, tuilian dinhmun report pawh a tichhuak nghal bawk. Harsatna tawkte chhanchhuah leh chhawmdawl hna hi NDRF, SDRF leh tualchhunga thuneitute'n an thawk mek a ni.

CWC-in Assam-a tuilian hi ziaawm hret hret angin tarlang mah se, India Meteorological Department (IMD) chuan ruah la sur belh zel tura a tarlan avangin Assam-a Subansiri, Jiabharali leh Kopili lui chu lian thei dinhmunah a la ding reng a, hei hi district pathum tan a la hlauhawm pha a ni. Hei vang hian CWC chuan lui tuite chu a chim ching chung lam aia sangah ni sarih chhung vel a la awm dawn nia tarlangin, mipuite chu inring reng turin a chah bawk.