Arunachal Pradesh : Assembly inthlanah BJP-in hnehna chang

Arunachal Pradesh state assembly inthlan, April 19-a neih chu nimin khan vote chhiarna neih niin, assembly seat 60 aṭanga seat 46 latu; BJP chu Election Commission of India (ECI) chuan hnehna changtuah a puang. Arunachal Pradesh-ah hian BJP hian a zawnin term thum sorkarna a siam thei dawn ta a ni.

Arunachal Pradesh-ah hian assembly seat 60 awmin, seat 50-ah inthlanna neih a ni a, seat 10 hi chuhtu awm loin BJP-in an la sa a ni. April 19 khan assembly seat 50 atan inthlan hi neih a ni a, nimin khan vote chhiar niin, BJP hian seat 46 lain hnehna an chang a ni.

BJP-in seat 46 an lak bakah hian National People's Party (NPP) chuan seat panga an la a, People's Party of Arunachal chuan seat pahnih la ve bawkin, Nationalist Congress Party (NCP) chuan seat pathumah hnehna an chang ve bawk. Heng bakah hian Congress chuan seat pakhat an la a, independent candidate pathum thlan tlin an bawk.

Assembly inthlana BJP-in hnehna an chan hnu hian prime minister Narendra Modi chuan X-ah Arunachal Pradesh mipuite hnena lawmthu sawina a post a, BJP sorkar chuan Arunachal Pradesh mipuite tana a hma zawng aia nasa zawka hna thawh a tum thute a tarlang. Term thara chief minister tur atan hian Pema Khandu hming lam rik a ni a, ani hi chief minister ni lai ni bawkin, term thar chief minister ni leh tura rin kai ber a ni.