Sikkim Assembly inthlanah SKM-in seat 31 lain sorkar an siam dawn

Sikkim Assembly inthlan neih zawh taka vote tlate nimin khan chhiar a ni a, Sikkim-a rorel lai; Sikkim Krantikari Morcha (SKM) chuan assembly seat 32 aṭanga seat 31 lain, a term hnihna atan Sikkim-ah sorkarna an siam dawn. Assembly inthlan hi April 19 khan neih a ni.

SKM hian BJP-in an thawhpuina an tihtawp avangin party malin 2024 assembly inthlan hi an chuh a ni. Assembly seat 32 awmin SKM hian seat 31 an la a, eptu party; Sikkim Democratic Front (SDF) chuan seat pakhat an la ve. Sikkim chief minister ni lai, Prem Singh Tamang chu chief minister ni leh tura rin kai ber a ni a, ani hian seat pahnih; Rhenock leh Soreng-Chakung aṭanga chuhin hnehna a chang ve ve . Prem Singh Tamang-a nupui, Krishna Rai pawhin Namchi-Singhithang seat-ah a khingpui SDF candidate a hneh ve bawk.

SKM hotu, Prem Singh hian mipuiin a party leh anmahni an ring tawk tih lantir nana nasa taka hnehna an chang chu lawmawm a tih thu sawiin, kum nga lo awm leh tura Sikkim mipuite tana an theihna zawng zawng hlan an tum thu a sawi. SKM hian 2019 assembly inthlanah khan seat 17 lain kum 25 chhung Sikkim-a rorel tawh, SDF sorkar an lo paihthla tawh a ni. SKM-in hnehna an chan tak avang hian nimin vek khan Sikkim Governor, Shri Lakhsman Prasad Acharya chuan sorkar hmasa ṭhiah nghal a nih thu a puang a ni.