Nagaland : Congress-in sorkar laipuiah hnehna chan inring

All India Congress Committee (AICC) Nagaland in-charge, Girish Chodankar chuan Nagaland chhunga Lok Sabha seat pakhatah hnehna an chang dawn tih sawiin, INDI Alliance ṭangrual pawl angin rampumah hnehna an chang dawn tih a sawi bawk.

Congress hian rampum huapa sorkarna siamtu zingah pawh hmun pawimawh tak an chang dawn tih tarlangin, exit poll-in Congress dinhmun chu duhawm lutuk angin tarlang lo mah se vote chiar a nih tak tak hunah erawh thil a danglam dawn tih an tarlang. Chodankar chuan India mipuite chuan BJP chu an hne tawh a, thutiam tihlawhtling lo, sorkar inrelbawl dan fel hlel, ṭhalai hna nei lo tam tak leh thil man sang zel chhanah BJP chu puhin vote thlaktu mipuite chuan India hmalam a en zawk nan vote an thlak tih a sawi a ni.

Chodankar chuan Nagaland-a urban local body inthlan awm tur chungchang sawiin June 26 inthlan hunah Congress chuan tel ve ngei an tum tih a sawi. Eastern Nagaland huamchhung tih loh hmun dangah chuan Congress party angin inthlan an chuh dawn a ti a, municipal pathum leh town council 36-ah an inthlang dawn a ni. Eastern Nagaland People's Organisation (ENPO) in Nagaland chhak lama inthlan boycott an tum an ṭhulh leh si a nih chuan Congress angin helai biala inthlanna turah an chuh tur thu a sawi bawk. S. Supongmeren Jamir, Nagaland Pradesh Congress Committee (NPCC) president chuan local body inthlan an hmachhawn turah Congress aiawha ding duh an awm a nih chuan June 7 hmain dilna a theh luh theih tih a puang.