Assam : Tuilianin mi nuai 5 chuang a la nghawng

Tuilian vanga harsatna tawk mek, Assam-ah chuan mi pathumin nunna chan belh lehin thi zat hi 18 an tling tawh a, tuilianin a nghawng hi mi nuai 5 chuang an la ni bawk.

Tuilian hian kam lam aiin san lam a la pan zel a, hmun tam tak chim belh mah se nunna chan erawh an pun belh tawh vak lo thung. Assam State Disaster Management Authority (ASDMA) tarlan danin district 13 aṭangin tuilian hian mi 5,35,246 nunphung a tikhaihlak mek a, heng zinga tam tak hi chu chhawmdawlna in lamah dah luh an ni tawh a ni. Hei hi kar liamta Inrinnia mi nuai 6 tuilianin a nghawng tih tarlan a nih aṭangin a tlahniam tawh bawk. Nimin khan Cachar leh Nagaon aṭangin nunna chan an awm belh leh tak avangin May 28 hnuah tuilian leh thlipui vanga nunna chan 18 an awm tling tawh a ni.

ASDMA tarlan danin, Assam chhunga lui lian pathum - Kopili, Barak leh Kushiyara lui te chu an chim chinin hlauhawm chin a la pel a ni. Assam chhunga district hrang hrang zingah Nagaon chuan tuar na berin, tuilian hian mi 3,03,567 a nghawng a, Cachar (1,09,798) leh Hojai (86,382) chuan an dawt. Relief camp 193-ah mi 39,000 sawn chhuah tawh niin relief distribution centre 82 pawh an la lun hle.

Chhanchhuah hna hi pawl hrang hrang- NDRF, SDRF leh khawtlanga thuneituten anmahni awmna hmun ṭheuhah thawkin a ṭul angin medical team pawh an thawkchhuak ṭhin. Tuilian hian hmasawnna ruhrel tam tak a tihchhiat bakah thlai hmun leh in a tichhe nasa hle bawk.

India Meteorological Department (IMD) chuan Assam leh Meghalaya-ah ruah tla a la tam dawn tih tarlangin lui lian leh leimin vangin state pahnih hian harsatna an la tawk thei tih an tarlang. IMD hian ni engzat chiah nge ruah hi a la tlak dawn tih sawilang lo mah se ni eng emaw zat chhung chu state pahnihah hian ruah tla hi a la tam dawn tih an tarlang a ni.