Assam-ah BJP sorkar lakluh a ni ta

Bharatiya Janata Party (BJP) chuan hun rei tak chhung a lo nghah tawh Assam-ah chuan sorkar thar a din ta a, nimin khan Sarbananda Sonowal chu Assam chief minister 18-na ni turin lakluh a ni. Sonowal rual hian minister te bakah an thawhpui AGP leh BPF MLA te chu rinawmna thu tiam tira lakluh an ni.

Sorkar thar lawmluhna hi tlai dar li leh a chanve-ah ṭan a ni a, India Prime Minister Narendra Modi, BJP President Amit Shah, union minister eng emaw zat leh BJP sorkarna state hrang hrang chief minister-te bakah hmarchhak state-a chief minister te chu an tel
ṭha hle a ni. Mipui nuai khat chuang zet an pungkhawm a, sakhaw hruai-tu an tel nual bawka an zingah hian Yoga Guru Baba Ramdev, Sri Sri Ravi Shankar leh Satradhikars te pawh he hunah hian an tel a ni.

PM Narendar Modi chuan,"Vawiina helai hmun ka rawn kalna chhan chu Assam mipui-te hmangaihna vang leh kan party chunga ṭhat in chhuah vang chauh a ni. Hei hi a bul ṭanna chauh a la ni a, Assam mipuite thlawpna avangin party aiawhin lawmthu ka sawi a, mimal tak pawhin ka lawm hle a ni" a ti.

Sorkar thar lawmluhna inkhawm hi darkar khat leh a chanve chhung hman a ni a, Veterinary College playground Khnanpara Guwahati-ah hman a ni. CM atana lakluh tak Sarbananda Sonowal hian Thawhṭanni khan Naxatra tlawhin Krishnaguru hnen aṭangin malsawmna a dawng a ni.