ANSTA leh NSSFOF te ni thum chawl dawn

All Nagaland School Teachers’ Association (ANSTA) leh Nagaland Secondary Schools Field Officers’ Federation (NSSFOF) te hmalaknain Nagaland-a school 2,069 zeta zirtirtu 21,000 te chuan a huhoin ni thum chawlh an la dawn. Zirtirtute hian secondary/elementary aṭanga higher secondary chu department hrana awm an phut a, an thil phutte sorkarin a tihhlawhtlin sak mai loh avangin May 24-26 chhung a huhoa chawlh lak an rel ta a ni.

Hemi chungchangah hian Thawhṭannni khan press conference koh a ni a, ANSTA general secretary, Visato Koso leh NSSFOF secretary, Kevitsiano Luho te chuan sorkar chu ni 20 chhunga an thil phut te tihlawhtling turin an phut tih sawiin, sorkarin a ngaihsak tawk loh avangin lungawilohna lantir chu an tihtur awm chhun a nih thu an sawi. An thil phut chu a hlawhtlin mai loh chuan June 1 thleng kalpui an tum thu an sawi a ni. Elementary/secondary aṭanga higher secondary chu deparment hrana a awm chuan kawng tam taka ṭhatna a nei dawn a, zirna pawhin hma a sawn dawn niin an sawi. ANSTA leh NSSFOF te chuan an thil phut chu kum 13 zet sorkar-in a ngaihthah sak tawh niin an sawi bawk.

Elementary/secon-dary leh higher secondary te chu department hrana awm tur niin an sawi a, a luh dan pawh a in anglo tih sawiin, seniority list, promotional channel leh academic session te chu a hrang hlak a ni an ti a, zirlai pawh pawl 10 an pass chuan zirna sang zawk zawm turin transfer certificate (TC) pek ṭhin an ni, an ti.

Commissioner and secretary school education and SCERT F.P. Solo chuan ANSTA leh NSSFOF te thil phut school education department hran din chu tun maiah chuan tih hlawhtlin theih a nilo, a ti. F.P. Solo-an Nagaland Post a hrilh dan chuan primary school, middle school leh high school te chu school
ṭhenkhatah chuan a hrana kalpuia ni tawh tih a sawi a, zirtirtu tam zawk an awm thei niin a sawi bawk.