Thingtlang khaw 32-ah eng pek a ni tawh

Power Ministry tarlan danin Deen Dayal Upadhyaya Gram Jyoti Yojna (DDUGJY) hnuaiah India ram chhunga thingtlang khaw 7,874 zet te chu he scheme kalpui an nih hnuah electric eng pek an ni tawh. Heng zingah hian hmarchhak atangin thingtlang khaw 32 zet a tel.

Thingtlang khua, electric eng la luh lohna zawng zawnga eng pe tur hian sorkar laipui chuan scheme a duang a, he scheme Deen Dayal Upadhyaya Gram Jyoti Yojna (DDUGJY) hmang hian thingtlang khua zawng zawngah eng pek vek tuma hmalak mek a ni.

Power Ministry tarlan danin tun hnaia eng pek, khaw 108 zinga thingtlang khaw 32 chu hmarchhak state huamchhuang a mi te an ni. Assam state huam chhunga thing-tlang khaw 26 te chu DDUGJY hnuaiah hian eng pek an ni a, Arunachal Pradesh-ah pawh eng pek thar thingtlang khua paruk a awm bawk.

Deen Dayal Upadhyaya Gram Jyoti Yojna (DDUGJY) hmang hian India ram chhunga eng la thlen lohna khuaahte eng pe vek turin hma lak mek a ni a, eng la thlen lohna thingtlang khua 18,452 zet la awm mekte chu May 1, 2018 hma ngeia pek hman vek tum a ni.