Assam sorkarin a tih tur ti ṭha tawk lo : Javadekar

Environment and Forests Minister Prakash Javadekar chuan tunhnaia Kaziranga National Park (KNP)-a Samak (rhinos) thahna thlengah Assam sorkar chu mawhphurtu a ni, a ti. Kaziranga National Park-a samak te hi tunhnaiah Britain lal tupa te nupa chuan a hmunah kalin an tlawh a, he hmuna hun an hman lai hian sapeltu tu tih hriat loh te chuan Samak hi an kap a ni.

Samak ki pakhat nei chi hi India ram mai ni lo khawvel huap pawha ramsa vang tawh tak a ni a, sapeltute chuan a ki an duh vangin a rukin vawi tam tak an pel ṭhin. Kaziranga National Park-ah hian samak eng emaw zat an la awm vangin a hmingthang hle a, mahse tunhnaiah boruak duhawm loin a tuam mek a ni. Sorkar laipui chuan heng samak te hi an mang mai loh nan venhim kawngah tha a thawh ve reng a, state sorkar pawhin a ngai pawimawh hle. Mahse tunhnaia sapeltute chet danah sorkar laipui a lawm lo hle a, state sorkar chu venhimhna thawk ṭha tawk loah a puh a ni.

Union Minister Prakash Javadekar chuan Assam-a Congress kaihhruai sorkar khan Kaziranga National Park thawm ṭhat leh venhimna kalpuina tura sorkar laipui aṭanga a sum hmuh te a hmang dik tawk lo tih sawiin, chief minister kal chhuak ta Tarun Gogoi-a sorkar khan Special Rhino Protection Force chu a ngaihthah niin a sawi. Sorkar chhinchhiah dan chuan Assam-a Kaziranga National Park-ah hian kum 2006 hnu lamah Samak 123 zet chu sapeltute chuan an kap tawh a ni. Javadekar chuan sawi chhunzawmin, Sarbananda Sonowal-a kaihhruai BJP sorkar thar chuan chak zawkin hma a la thei dawn niin a sawi a, hei hian an harsatna tawh mek chu a sut kian theih a rin thu a sawi bawk.

Thawhṭanni khan central-a BJP kaihhruai NDA sorkar kum hnih tlin lawmna neih a ni a, he hunah hian Environment and Forests Minister Prakash Javadekar chuan thu sawiin, India-in ramngaw a neih mek chu kum hnih chhung lekin nasa takin a pung a ni a ti. "Tun din hmunah ram ngaw kan neih mek chu ram zau zawng aṭanga chhutin 21% a ni a, hei hi 33%-ah tipung tura hmalak mek a ni", a ti.