Lambunna-a nunna chante ruang thawn haw tawh
Manipur Chief Minister O Ibobi Singh chuan Assam Rifles te lambun an ni chu pawi a tih thu sawiin, thi chhungte chu thinlung taka a tuarpui thu a sawi.
Assam Rifles te hi Pathianni khan Manipur-a Chandel district Myanmar ramri depah hel tu tih hriat loh ten an lambun a, mi parukin nunna an chan a, thi zingah hian Junior Commissioned Officer pakhat a tel nghe nghe. He vanduaina thlenga nunna chante ruang hi anmahni khaw lamah ṭheuh thawn haw an ni tawh.
Manipur CM Okram Ibobi Singh, Deputy Chief Minister Gaikhangam, GOC 3 Corps Lt Gen Abhay Krishna, GOC 57th Mountain Division, Major General SS Mishra, DGP Manipur leh Assam Rifles officer te chuan ruang thawnchhuahna inkhawm tawi buatsaih an telpui a ni.
CM Ibobi Singh chuan, pawikhawihna thleng chu sorkar chuan a dem tak zet tih sawiin, na taka chhan let a ni ang a ti. Inlambunnaa nunna chan te hi Subedar Baldev Kumar Sharma, Rifleman Bhupender Kumar Una, Riflemen Pawan Kumar, Mahesh Gurung, Akhilesh Kumar Pandey leh Surjit Barla te an ni. An ruang hi Imphal International Airport
aṭangin Indian Air Force aircraft pahnih hmangin an chenna hmun panpui an ni.
Lt Gen Abhay Krishna pawh -in inlambunna thleng chu pawi a tih tak zet thu sawiin, pawikhawihtute chu na taka beihlet an nih tur thu a sawi. Army leh Assam Rifles te chuan inbeihna thlenna velah hian hel te dap chhuak tur hian beihpui an thlak nghal a, Indo-Myanmar border vel ramngaw te chu dap nghal a ni. Henglai ramngaw hi hel te chuan tawm nan an hmang ṭhin tih hriat a ni.