Nagaland-ah DAN sorkar kum 2-na an lawm

Nagaland Chief Minister TR Zeliang chuan minister leh MLA te chu sorkar tana ṭheih tawp chhuah a thawk zel turin a fuih.

Thawhlehni khan Zeliang-a kaihhruai DAN sorkar kum hnih tlin lawmna chu state banquet hall-ah hman a ni. He hunah hian Chief Minister TR Zeliang chuan thu sawiin, a kaihhruai DAN sorkarin kum hnih a tling ta chu ropui a tih thu sawiin, a thawhpuite thlawpna avanga kum hnih hmel an hmu thei ta chu thil chhinchiah tlak tak a ni, a ti.

DAN sorkar hlawhtlinna hrang hrangte tarlangin, Zeliang chuan kum 2014 aṭang khan online taxation system chu a vawi khatna atan an state-ah an hmang ṭan tih sawiin, hei hian nasa takin mipui a chhawk zangkhai a ni, a ti. “Vision Document” chu kalpui tura hmalak leh mek a ni a, hei bakah hian Vision 2020 for North East Region (NER) leh Act East Policy te chu an state chuan ṭangkai taka chhawr a tum tih a tarlang bawk. “Vision Document”-in a tum ber chu nitin mamawh ei leh bara intodelh a ni a, chu mi tur chuan hmalakna kalpui mek a ni, a ti. Zeliang chuan sorkarin a ngaihpawimawh ber chu remna leh muanna a nih thu sawin, Naga politics buai mek chu chinfel thuai a ni ang a ti bawk.

Nagaland chuan Assembly seat 60 a nei mek tih CM Zeliang chuan sawiin, opposition party awm loa sorkar kalpui theih a ni a ti. Chu mi tur chuan inlungrual taka kal a ngai a, Nagaland Legislator’s Forum (NLF) chuan Naga Political Issue chu a ngai thu tak hle a ni a ti. August 3, 2015-a inremna lo ziah tawh chu vawnnun zel a ṭul tih sawiin, Prime Minister ngei pawhin Hosue-a kan inlungrualna te chu min hmuhpui a ni Zeliang chuan a ti. Lawmthu sawi inkhawm buatsaihah hian Speaker, state chaplain Rev Kuzeirang Thou, state chief secretary Pankaj Kumar te chuan thu an sawi bawk a ni.