Covid-19 vangin Manipur doctor a thi

Manipur-ah gynaecologist, Dr Wahengbam Imo Singh chu Covid-19 vangin a thi a, an state-a hripui vanga doctor thi hmasa ber a ni. 

Kum 65 mi, Dr Wahengbam Imo Singh hi gynecologist (IVF specialist) a ni a, Delhi-a private hospital-ah enkawl niin Thawhṭanni khan a thi a ni. Dr Wahengbam hi Imphal-a Suba Hospital & Assisted Reproductive Center-a consultant a ni a, a duty-na aṭangin Covid-19 hi a kai a ni. 

RIMS Hospital, Imphal-ah enkawl a nih hnuin a chuap lam a khawih tel tawh avangin Delhi-a Apollo Hospital-ah kalpui a ni a, mahse a nunna an chhan thei ta lo a ni. Dr Wahengbam hi Obstetrics and Gynaecology Society, Manipur-a president ni lai a ni bawk. 

Manipur-ah hian healthcare worker zingah an duty-na aṭanga Covid-19 kai eng emaw zat an awm tawh a, mahse  Dr Wahengbam tih loh chu thihpui an la awm lo.

State chhunga hripui kai hmuh chhuah tawh hi mi 13,326 an ni tawh a, an zinga 10,504 chu enkawl dam an ni tawh a, Covid-19 vanga thi hi mi 91 an tling tawh bawk.