Biakin sak phal loh vangin AP-a Kristiante lungawi lo

Arunachal Pradesh-a Kris­tian-te chu BJP sorkarin  India-China border bul, Tawang khuaa biak-in sak a remtih loh avangin an lungawi lo hle. 

Arunachal Christian Forum chuan chief minister Pema Khandu hnenah Tawang Chris­tian Revival Church sak tum chungchanga harsatna awm chu chingfel turin a ngen a, sorkarin a chinfel thuai loh chuan lungawi lohna lantirah an vau bawk. 

Forum chuan biak-in sak tumna hi kum 1999 aṭanga buai­pui ṭan ni tawhin, dilna hrang hrangte pawh tualchhung thuneitute kaltlangin kum 2003 khan sorkarah thehluh a ni tawh a, tun thlengin thuneitute lamin an dilna hi an la ngaihtuah sak lo niin an sawi. 

Biak-in sak tumna hmunah hian makeshift church a awm a, biak-in ngheta sak tuma kum 2015-a hma lak a nih aṭangin harsatna a awm ṭan a ni. Pastor Joseph Singhi pawh  dan loa in saa puh chungchangah police-te chuan an lo man tawh bawk a, mahse a hnuah chhuah leh nghal a ni. 

Arunachal Pradesh Christian Revival Church Council president Tai Ete chuan kum 1999-a make­shift church siam a nih khan tumahin harsatna leh dodalna an nei lo tih a sawi. "Mahse kum 2015-a RCC building-a sak a nih aṭang khan dodalna kan tawk chho a ni. Thuneitute chuan sorkar ram a ni a, sak phalna kan nei lo tiin an sawi," a ti. Mahse kum 2003 khan hetih lai chief minister Gegon Apang bakah minister leh district magistrate-te hmuin, anni hian dodalna engmah an neih loh thu a sawi. 

Ete chuan biak-in sakna hmun chu ram ruak a ni a, kawng sir bul mai pawh a ni lo tih a sawi. "Eng dan mahin Tawang-a biak-in sak hi a khap lo a, sakhaw hrang hrang betute pawhin an sakhaw hmun sa turin dikna an nei a ni," a ti.