Assam-ah BJP tlakchhiat a inṭan : Jairam Ramesh

Congress party general secretary Jairam Ramesh chuan Lok Sabha inthlan result chuan Assam-ah BJP tlakchhiat a inṭan tih a entir a ni, a ti. Congress chuan Assam-a bial ṭhen hran danah thil fel hlel awm mah se an party chuan MP pathum lai an nei thei chu lawmawm an tih thu an sawi bawk.

Assam chief minister Himanta Biswa Sarma chuan Congress tlak hniam nan theih tawp chhuah mah se awmzia a awm lo tih Jairam Ramesh chuan sawiin, vote tla zawng zawng aṭangin 37.48% chu Congress-in an hmu a, hei hi inthlanpui hmasaa an vote hmuh let dawn a tlin thu a sawi. Congress hruaitu Pradyut Bordoloi chu vote nuai 2 dawna chakin, an candidate dang Gaurav Gogoi chak loh nan Himanta chuan theihtawp chhuahih, public meeting pawh vawi 25 zet nei mah se Gogoi hi vote nuai 1 velin a chak tho a ni, Ramesh chuan a ti.

Assam-ah hian Lok Sabha seat 14 awmin Bharatiya Janata Party (BJP) in seat 9 an la a, Congress in seat 3 lain tualṭo party in seat hnih an la ve bawk. BJP leh Congress party seat lak zat hi inthlau viau mah se, Congress candidate-te tlinna hi a san bakah, a tling zo lote pawhin vote an hmuh ṭha thawkhat hle a, hei vang hian vote tla zat zawng zawng aṭanga party vote hmuh zatah BJP aiin Congress an sang zawk. Congress vote share hi 37.48% a nih laiin, BJP vote share hi 37.43% a ni thung. Lok Sabha inthlan neih zawh taka an beisei aia an chet ṭhat avang hian Assam-a BJP sorkar tawpna chu a inṭan niin Ramesh chuan a sawi a, Himanta chu chief minister a nih anga a hun a tawp hnai ta, a ti.

Assam CM-in state pathuma BJP chak loh chhan a sawi

Assam chief minister Himanta Biswa Sarma chuan state pathum- Meghalaya, Nagaland leh Manipur-a National Democratic Alliance (NDA) chet chhiat chhan chu sakhaw zuitu ṭhenkhatin BJP an vote loh vang niin a sawi. Northeast Democratic Alliance (NEDA) convenor Himanta chuan a mimal ngaihdana state pathuma an chak loh chhan chu sakhaw hruaitu ṭhenkhat, NDA dodal an awm vang a ni, a ti.

Sarma hian NDA duh loa dodaltute chu eng sakhaw zuitute nge an ni tih sawi lang lo mah se state pathum a tarlan hi Kristian tamna an nih vangin hemi sakhaw zuitute hi a sawi chhan niah a ngaih theih. Sarma chuan heng sakhaw zuitu, NDA duhlotute hi state pathumah hian an ṭhahnem hle tih sawiin politics chu sakhuana nena chawlhpawlh chi nia a ngaih loh thu a sawi a, heng sakhaw betute pawh hi politics a inrawlh ngai lo tak ni mah se tun ṭumah erawh an inrawlh a ni, a ti.

Meghalaya-ah hian BJP chuan an party aiawh candidate nei lo mah se Shillong leh Tura constituency-ah NDA a an thawhpui National People's Party (NPP) candidate an thlawp a, mahse Congress (Tura) leh Voice of the People Party (Shillong)-te chu an chak a ni. Nagaland-a seat awmchhunah Congress chak bawkin Manipur-a Lok Sabha seat pahnihah Congress an chak ve ve bawk. Heng state pathum zinga pahnih, Meghalaya leh Nagaland-ah hian state chhungah Kristian sakhaw vuan tam berin Manipur-ah pahnihna an ni bawk.