Meghalaya : VPP-in NDA zawm an tum lo

Meghalaya-a Lok sabha seat hnih awm aṭanga seat pakhat zawk, Shillong constituency aṭanga thlan tlin, Voice of the People Party (VPP) chuan BJP kaihhruai National Democratic Alliance (NDA) zawm an tum lo tih an puang.

VPP hotupa, Ardent Miller Basaiawmoit chuan sakhaw zalenna leh zah taka sakhaw dang zawng zawng en theih chu VPP innghahna pawimawh tak a ni tiin, "BJP nen chuan an rilru a inhmu lo a ni," a ti. INDIA thlawp mai an hnial lo tih sawi bawkin, sakhua leh hnam tlem zawkte him nan INDIA chu an thlawp thei reng tih a sawi a. VPP chief Basaiawmoit chuan hetiang hian sawi mah se INDIA movement-ah erawh mumal taka tel an tum loh thung a, INDIA in an mamawh hunah erawh thlawp an hnial lo tih a sawi.

VPP candidate Ricky AJ Syngkon chuan Shillong bialah Congress hruaitu leh MP nilai Vincent Pala chu vote nuai 3.7 in a hneh a, MP pakhat chauh nei ni mah se sorkar laipuiah party mala sorkarna siam thei an awm loh avangin NDA hian sorkar nghet tak siam turin an mamawh a tih theih. Meghalaya-a seat pakhat zawk, Tura constituency-ah Congress candidate Saleng A Sangma chuan hnehna a chang ve bawk a ni.