Tripura : CPI-M in tharum thawhna thleng tawh lo se an duh thu sawi

Communist Party of India-Marxist chuan Tripura sokar hnenah ngenna thlenin, inthlan zawh hnua tharum thawhna thleng ṭhin chu veng tura an duh thu an tarlang.

CPI-M secretariat chuan inthlan result puan a nih hma khan rorellai party chu buaina chawk chhuak zawnga khawsaah puhin, pawisa leh sorkar thuneihna hmangin politics boruak ṭha lo tak siamah an puh a ni. Hetianga rorellai an chet avang hian eptu pawl tan chet ve a harsat thu sawiin, polling booth aṭangin an agent tam tak hnawh chhuah an ni tih an sawi bawk. Hemi bakah hian vote thlak tur tam tak chu polling station lamah kal an phal lo a, CPI-M leh INDI Alliance in mipui sorkar tundin an tumna kawngah Tripura chhungah harsatna an tawk tih an tarlang a ni.

Tripura-a seat pahnihah BJP chuan hnehna chang mahse state chhungah harsatna hrang hrang an tawk mek tih tarlangin mipui nitin mamawh, hnathawh tur tlem leh eitur tlem, eirukna hluar, ṭhalai hna nei lo tam tak bakah dan leh hrai kenkawh kawngah harsatna an tawk reng a ni, tiin CPI-M chuan a sawi. Tun inthlanpui result-ah hian BJP tan chuan lawmna tur aiin zahna tur a tam zawk tih an sawi tel bawk.

CPI-M state secretariat chuan Tripura mipuite leh an party tana thawktute zawng zawng chungah mipui sorkar tung ding tura an beih avang leh, India danpui humhim tura theihtawp an chhuah vangin lawmthu an sawi a, hetiang inpekna hi hmalam hunah chhawm nung zel turin an chah bawk. Inthlanna ralmuang tak neih an duh tih sawiin state sorkar chu inthlan zawh hnua tharum thawhna a thlen loh nana hma la turin a ngen bawk.