Manipur : Jiribam district-a buaina chhuak, in 72 hal a ni

Manipur chhunga chi leh chi inkara buaina chuan ziaawm lam a la pan thei lo a, Manipur Fire Service Head office chuan Inrinni khan Jiribam district -a khaw paliah darkar 24 chhungin in 72 hal a ni tih an sawi.

Lamtai Khunou khua chu a tuar na ber niin in 65 tih chhiat a ni. Jiribam district-a inbeihna thlengah hian chenna in bakah sorkar buliding pathum beih tel a ni bawk. Chotobekra-a police outpost bakah Gaokhal leh Jiribam-a forest office buliding chu beih an ni.

Inbeihna thleng hi helpawl tih ngei nia rin ni mah se eng helpawl tih nge tih erawh hriat a la ni lo thung. Thuneituten bungraw tih chhiat hlut zawng hi an la sawichiang thei lo a, boruak a la sosan avangin hma lak chak theih a la ni lo tih an sawi.

Jiribam district-a buaina chhuah chhan ber hi Soibam Saratkumar Singh, Meitei mi kar liamta Ningania thah a nih vang a ni. District thuneitute chuan buainain zual lam a pan zel loh nan Jiribam district leh Tamenglong huam chhungah tiam chin awm loin curfew an puang nghal bawk. Meitei leh tribal chuan buaina tichhuaktuah an inpuh tawn a, Meitei pawl Coordinating Committee on Manipur Integrity (COCOMI) chuan Kuki helpawl leh dan loa pem lutte chu buaina ti punlun tua puhin, rorelna hran an ngiat tihhlawhtlin a nih theih nan hetianga cheah hian an puh a ni.

Indigenous Tribes Advocacy Committee (ITAC) chuan buaina chhuahna hmunah bandh an puan bakah police-te chu hma an lak danah fimkhur turin an chah. Tribal pawl dang Kuki Inpi chuan Kuki chenna in hal a ni chu an dem thu tarlangin, thuneitute chu buaina titawp turin an ngen. Buaina chhuak a ziaawm theih nan venghimtute dah luh belh niin heng zingah hian Manipur police commando-te pawh an tel.