Bru-te awmna tur chinfel nan thla ruk kan mamawh: Tripura CM

Tripura-a Bru refugee-te awm nghehna turin sorkar laipui, Tripura leh Mizoram sorkarten inremna an ziak tawh a, mahse an state-a Bru refugee te inbenbel dan tur tihfel nan chuan thla ruk tal hun an mamawh dawn niin Tripura chief minister Biplab Deb chuan a sawi. 

Kar liam ta Ningani khan inremna hi ziah a ni. Hemi chungchanga chanchinthar lakhawmtute a kawmnaah, Deb chuan, "Inremna kan siam ang chuan, Bru refugee zinga Mizorama kir duh an awm chuan an kir ang a, a duh lo erawh chu Tripura-ah an awm zui a ngai ang. Heng state pahnihah hian an awm duhna an thlan a ngai a ni," a ti. 

Tripura-a Bru refugee te awmna tur buaipui leh enfiah turin revenue department pawh hriattir a ni tawh tih CM chuan a sawi. Hei bakah hian an state-a Bru refugee awm zat pawh chhiar ṭhat leh a ni dawn tih a sawi bawk. 

Inremna an siam anga hamṭhatna awmte chu Kanchapur-a relief camp-a khawsa mek, Bru chhungkua 5,400, mi 34,000 velin an chhawr thei dawn a ni, a ti. Bru refugee te chu an awmna tur ram, feet 40x30 a zau pek an ni dawn a, fixed deposit-in cheng nuai li dahsak an nih bakah, kum hnih chhung thla tin Rs 5000 leh ration a thlawna pek an ni bawk dawn a ni. 

Sorkar laipui chuan Bru refugee-te awmnghehna tura inremna ziahte kalpui a nih dan enpui tur hian joint-monito-ring committee a din dawn a, committee-ah hian special secretary (internal security), MHA chu chairman a ni ang a, joint secretary (North East), MHA; additional chief secretary (forest), Tripura: principal secretary (revenue),Tripura; bakah Bru organisations party aiawh pakhat ṭheuh leh Indi­genous Progessive Regional Alliance (TIPRA) aiawhte chu member an ni bawk ang.