Nagaland : BJP leh NDPP thawkdun dawn

Bharatiya Janata Party (BJP) Nagaland State president Benjamin Yepthomi chuan thuchhuah siamin, an hma lawka municipal leh town council inthlan neih turah BJP chuan an thawhpui Nationalist Democratic Progressive Party (NDPP) nena an inremsiam dan angin candidate an ruat dawn tih a puang.

BJP chuan MLA an neihna bial 12-a municipal leh town councils candidate turte chu anmahni party aṭangin an theh chhuak anga, chutiang bawkin NDPP chuan MLA an neihna bial 25-a candidate tur duh an thlang ve thei bawk ang. BJP leh NDPP in MLA an neih lohna bial 23-ah erawh party pahnih hian candiate an nei ve ve thei thung ang.

BJP state president Yepthomi chuan khawi party emaw zawk chak theihna tur biala an rinah chuan party pahnih hian an candidate-te an inthlawpsak dawn tih a sawi. Yepthomi chuan hetiang thutlukna an siam chhan chu Nagaland-a rorel mek, People's Democratic Alliance (PDA) hnuaia thawkho BJP, NDPP leh independent MLA te ṭhat tlanna atana ti an nih thu a sawi bawk.