ANSTA leh NSSFOF-ten Lungawilohna lan tir zel dawn

Nagaland-a zirtirtu 21,000 zet lungawilo te chuan sorkar aṭanga chhanna duhawm an la dawn loh avangin lungawilohna an lan tir mek chu chhunzawm zel an tum thu an sawi.

Sorkar laka lungawilote hian a hu hoin ni thum chawlh an la tawh a, elementary/Secondary aṭanga higher secondary chu deparment hranna awm an phut a ni. An thil phut hi a hlawhtlin mai loh chuan June 1 thlenga lungawi lohna lantir an tum thu an lo sawi tawh bawk.

All Nagaland School Teachers Association (ANSTA) leh Nagaland Secondary Schools Field Officers Forum (NSSFOF) te hian May 24 aṭang sorkar laka an thilphut te a hlawhtlin theihnan a huhoin chawlh an la ṭan a, School Education deparment chu ṭhenhran an phut a ni. ANSTA leh NSSFOF aiawh te chuan hemi chungchangah hian School Education minister leh SCERT te chu an lo titi pui tawh a, mahse an duh anga sorkarin an thilphut te a tih hlawhtlin sak mai dawn lo nia an hriat avangin an lawm lo hle. Yitachu chuan, "Kan thilphut hi sorkar chuan ennawn leh se kan duh a, kar khat chhung ngeiin he mi chungchangah hian education department chuan hriattirna pe chhuak turin kan phut a ni" a ti.