Meghalaya : Malaria leh Dengue vanga thi an tlem theih nan sorkarin hma la

Meghalaya health minister Ampareen Lyngdoh chuan Malaria leh Dengue vanga thi an tlem theih nan sorkar chuan theihtawp an chhuah tih a sawi. Meghalaya-ah hian kum hnih chhungin Malaria leh Dengue vangin mi 14 in nunna an chan tawh a ni.

Ampareen Lyngdoh chuan Meghalaya chhunga sikserh leh dengue kai an tam chhan pakhat chu sik leh sa a danglam chak vang a ni tih a sawi. Health Minister hian kum 18 hnuai lam tan sikserh vanga thih a hlauhawm zual tih sawiin, ASHA-ah test tam zawk, a bikin naupang tan kalpui a ngai a ni, a ti. Tui tlinna leh tui luan kawr chu thosi hloa an kap a nih pawhin mihring tana hlauhawm loh hmang turin mipuite a chah bawk.

Sikserh emaw dengue emaw vanga thi zingah an khawsik hnua an inentir thuai loh vanga thi an tam tih sawiin, Lyngdoh chuan hei hi hunrei tak aṭanga an buaina a nih tawh thu a sawi tel bawk. Hetiang kawnga inzirtir nan hian sorkar chuan lehkha ziak leh social media hmangin mipui hnenah zirtirna an thehdarh ṭhin a, social media influencer-te pawh sorkar chuan a la hmang ṭangkai dawn a ni, a ti.

Meghalaya Health Minister chuan an medical team inpekna zarah sikserh leh dengue vanga thi hi an tlem zel a beisei a, inthlanpui atana a vah chhuahnaah Shillong Lok Sabha biala assembly constituency a tlawh 36-te chuan faina kawngah hma an sawn tih a hmuh thu a sawi bawk. Lyngdoh hian a rang thei ang bera test neih leh thosilen zar chu heng natna pahnih do nan hian a pawimawh tih mipuiten an hriat a pawimawh tih a sawi.