Manipur : National Highway-37 khar tumna Naga zirlai pawlin duh lo

Manipur-a Jiribam district-ah buaina a chhuah leh avangin Kuki Inpi (South West Sadar Hills), Kuki Students Organization (South West Sadar Hills) leh Kuki Women Union (Moltam region) te chuan National Highway - 37, Imphal leh Jiribam inkalpawhnaa Kuki awm tamna laia kawngpui, nimin chhunga khar tura thupek an tihchhuah chu Rongmei Naga Student's Organisation Manipur (RNSOM) chuan an duh lo tih tarlangin, NH-37 chu khar a nih loh tur thu an puang.

RNSOM hian Imphal leh Jiribam inkar kawngpui chu Rongmei Naga hnam ram chin a ni tih tarlangin, an pi leh pute hunlai aṭanga an ram a nih tawh thu leh, Kuki hnam chu pem thar an ni tih an sawi tel bawk. Naga zirlai pawl chuan kawngpui khar tumna vanga thil thleng duhawm lo a awm a nih chuan Kuki hnam mawhphurhna a nih tur thu an tarlang a, NH-37 chu Manipur chhung leh pawna hnam hrang hrang chengte chakkhai lakluhna a nih vangin khar an remti lo tih an sawi.

Rongmei Naga zirlai pawl chuan NH-37 chu tunah emaw nakin hunah emaw pawh nise pawikhawihna hmun atan an phal dawn lo tih sawiin, helai kawngpui zawhtu state police leh Manipur chief minister security convoy lo lambuntu Kuki helpawl te chu an dem thu an tarlang bawk. Remna ngaina tak hnam an ni tih sawiin state forces zinga an mi leh sa beih an nih fo chuan loh theih loha indona an zawm ve a ngai dawn tiin an vau bawk.