Modi hian RSS hotupa thusawi a ngaihsak ka ring lo : Gaurav Gogoi

Rashtriya Swayamsevak Sangh (RSS) hotupa Mohan Bhagwat chuan tun hnai khan Manipur buaina chu rang taka chin fel a ngai tih sawiin, Manipur chu kum khat chuang remna leh muanna thlahhlel takin an awm tawh tih a sawi. Hetih lai hian Congress MP, Gaurav Gogoi chuan RSS hotupa thusawi hi prime minister Narendra Modi chuan a ngaihsak a rin loh thu sawiin PM a bei zui.

Jorhat bial, Assam aṭanga thlan tlin Gaurav Gogoi chuan Prime Minister Modi chu Manipur buaina chungchang pehhel tumah puhin, dan kengkawhtute chu hman ṭangkai tum leh India danpui ngei pawh tihdanglam tumah a puh. Gaurav chuan heng thil a thlen loh nan hian India mipuite chuan INDI Alliance chu an aiawha thusawi turin an thlang chhuak a ni tiin, INDI Alliance chuan India danpui leh rorelna in zahawmna humhim turin hma an la zel dawn tih a sawi.

RSS hotupa Mohan Bhagwat hian Nagpur-a thu a sawinaah Manipur chungchang hi sawi langin, "He state hi kum 10 chhung ralmuang takin a awm ṭhin a, mahse tun hnaiah ralthuam chelek a hluar hle," a ti a, buaina hi rang taka chinfel a ngai tih a sawi. Bhagwat thusawi hi Congress general secretary Jairam Ramesh chuan tuihnih vein, RSS hotupa chuan Manipur mipuiten vawi tam tak an ngenna ngaipawimawh in Modi chu Manipur-ah zinpui se a tih thu a sawi ve bawk.