Bengali-te'n CAA duh lohna an lantir

Assam-a Dibrugarh disrict-ah kar liam ta Inrinni khan Greater Moran Bengali Samaj-te chuan Citizenship (Amendment) Act duh lohna lantirin Moran-a National Highway 37 bulah darkar hnih chhung sit-in protest an huaihawt. 

Greater Moran Bengali Samaj te huaihawta sit-in protest neihnaah hian Moran-a pawl dang eng emaw zat an tel bawk a ni. Nawrh huaihawtte hian CAA chu ṭhiat turin sorkar laipui an phut a ni.

"Assam hi kan pian leh kan seilenna hmun a nih avangin kan ram neihchhun a ni. State tana ṭha lo tur an do letna kawngah kan unau Assamese-te chu theihtawpin kan thlawp zel dawn a ni. State mipuiten nasa taka an dodal chungin sorkar laipui chuan he dan hi a siam lui a ni. CAA hi Assam tana ṭha lo leh ram danpui kalh a nih avangin Bengali Samaj chuan na takin kan dodal a, he dan siam tawh hi sut leh turin sorkar pawh kan phut nghal a ni," tiin an sawi.