Kum 2020-ah rel kawng liana thlunzawm tum

Railway Minister Suresh Prabhakar Prabhu chuan hmarchhak state zawng zawng te chu kum 2020-ah chuan rel kawng lian chi hmanga thlunzawm vek a ni ang a ti.

Railway minister hian Inrinni khan Assam-a Dibrugarh town railway station-ah thu a sawi a, he hunah hian hmarchhak state te chu kum rei lo te chhunga rel kawng lianchi lut vek theih tura hmalak a nih tur thu a sawi.

Guwahati railway station-a inkhawm buatsaih hi MP Bijoya Chakraborty, East Guwahati MLA Siddhartha Bhatta-charya leh NF Railway official te chuan an hmanpui a ni. Suresh Prabhakar Prabhu chuan, tun hnai kum hnih chhungin Indian Railways chuan hna nasa takin a thawk a, hmuh theihin hmasawnna chu a ṭhang a ni a ti. Tun dinhmunah Assam state chhunga station pali Guwahati railway station, Reverse Osmosis Water Purifier Plant (Guwahati railway station), Jorhat railway station leh Dibrugarh town railway station-ah te chuan free WiFi service a awm tawh a ni.

Indian Railways hmalaknain rel tlanchak chi darkar khata km 160 tlan thei Gatiman Express chu Nizamuddin leh Agra-ah tlan tir a ni, a ti bawk. Railway Minister chuan hmarchhak state te chuan kawng tam takah venneihna a nei a ni tiin, leilung hausakna te chu
ṭangkai taka hman a tul a, hei hi hriain Indian Railway chuan nasa takin hma a la a, hmarchhak tan ruahmanna hrang hrang sian a ni, a ti bawk.

UPA sorkar khan hmarchhak hmasawnna a ngaihthah niin Prabhu chuan a sawi a, NDA sorkar chhung reilo teah pawh hmarchhak hmasawnna chu hmuh theihin a ṭhang niin a sawi. Hmasawnna tak tak thleng tur chuan inkalpawhna ṭha a pawimawh tih sawiin, rel kawng siam kawngah a bik takin hmarchhak chuan hma a sawn hle a ni, a ti. NDA sorkar chuan chak takin hma a la zel a, harsatna awm te chu ziaka thlen kher loin social media kaltlang pawhin inhrilh hriat theih reng a ni, a ti bawk.

Prabhu chuan Assam Chief Minister Sarbananda Sonowal a titipui tur thu a sawi a, free WiFi service ṭangkai taka hmang turin mipuite chu chahin, stattion dangah pawh dah belh zel a ni ang, a ti. Guwahati railway station-a wifi hi RailTel leh Google ṭangkawp ten an bun a ni a, hmarchhak state zinga nei thei hmasa ber a nih bakah, world class service a ni, a ti bawk. India ram hmundang Mumbai Central station-ah pawh kumin January khan bun a lo ni tawh a, India rama station pakua-ah chiah hman a la ni.