National Human Rights Commission-in Assam sorkar zangnadawmna pe turin hriattir

National Human Rights Commission (NHRC) chuan Assam sorkar leh Defence Ministry chu Assam Police, Army leh parami-litary forces ten Assam state chhungah ṭum li zet thubelhchian dawl lo hmanga inbeihna an tih chhuah avanga nunna chan chhungte hnenah cheng nuai 30 pe turin a hriattir.

National Human Rights Commission chuan hetianga thubelhchian dawl lo hmanga inbeihna chhuak ṭum li zet a awm tih a hmuchhuak a, Assam Police, Army leh paramilitary forces te chu mawhphurtu an ni. Commission hian Assam sorkar chu nunna chan chhungte hnena zángnadawmna nuai 25 pe tur leh Union Defence Ministry chu zángnadawmna nuai nga pe ve tur hian a hriattir ta a ni. Assam state hmun eng emaw zata inbeihna thleng chu a chhan finfiahna leh thu mumal tak awmlo niin National Human Rights Commission hian a ngai a, heng inbeihna avanga nunna chan chhungte hnenah hian mawhphurtute hian zángnadawmna an pe tur a ni, a ti.

Nagaon district-ah July 23, 2008 khan inbeihna a chhuak a, police te silai hmehpuah-ah Piku Ali chuan nunna a chan a, Mriganka Hazarika leha Himanshu Gogoi te chuan February 23, 2011 khan Dispur-a inbeihna thleng avangin nunna an chan ve bawk.

Anni bakah hian June 22, 2009 khan Jwnwm Basumatary leh Okhophat Basumatary te chuan Furoibari hmuna inbeihna thleng avangin nunna an chan a ni. NHRC hian Assam sorkar chu heng vanduaina tawk chhungte hnenah hian zángnadawmna pe tur leh an pe ngei a ni tih hriattirna thla hnih ral hmaa report pe turin a hriattir a ni.