ILP issue: Nawrh kalpui zel a ni

Manipur-ah chuan Thawhṭanni khan Joint Committee on Inner Line Permit System (JCILPS) te hmalaknain hmun hrang hrangah lungawi lohna lan tir leh a ni. ILPS campaigner te chua lungawi lohna lantir nan hian hmun eng emaw zatah kawngpui an dang chat a ni.

Kawng dan a nih avang hian Imphal-ah chuan nunphung a khaihlak nasa hle a, lungawi lohna lantirtute chuan dawr leh sumdawnna hmun te an khar tir. Khualzin leh mipui nawlpui te chuan lirthei che vel a awm meuh loh avangin harsatna an tawk a, pa pakhat chuan silai a hmet puak a, a hnuah man zui a ni. License aṭanga a lan dan chuan he pa hi Longjam Amar (50), Kongba Keithel-a cheng a ni. Silai hmehpuah a nih vang hian police te chu che chhuak nghalin, zirnain te chu venhimna pek nghal an ni. Zirlai ṭhenkhat chuan an zirlaipui police ten an man chu chhuah phutin an nawr zui bawk. Heng zirlaite hi ILPS campaign rally-a man te an ni a, Thawhṭanni khan Imphal-a school hrang hrang leh college ṭhenkhat te chuan rally hi an buatsaih a ni. Rally-ah hian zirlai leh police te chu innawrbuaiin zirlai eng emaw zat chuan hliam an tuar a, hliam tuarte ṭhenkhat te hi hospital panpui nghal an ni. Police te chuan zirlai hmeichhe pariat te chu RIMS hospital-ah an dah lut bawk.

Zirlaite hian an hmui chu puan duma tuamin chief minister bungalow an pan a, an thlen hma hian police te chuan Moirang-khom-ah an lo dang a ni. Zirlai lung-awi lo te hian College Stu-dents’ Council din nghalin, sorkar chu an thil phut te June 2 ral hma ngeia tihhlawhtlin sak turin an phut tih an sawi. An thil phut a hlawhtling lo a nih chuan sorkar kar nan New Delhi-ah lungawi lohna an lantir tur thu an sawi bawk.

Inner Line Permit system chungchanga bill pass tawh tun thlenga hman a la nilo chu an hrethiam lo tak zet tih sawiin, zirlaite chuan sorkar laipui chu he bill pawmpui thuai tur hian an ngen tih an sawi. Manipur-ah hian Joint Committee on Inner Line Permit System (JCILPS) bakah pawl hrang hrang te chuan Inner Line Permit system hman phut hian lungawi lohna an lan tir fo thin a, sorkar chuan hma a lak mai loh vangin lungawi lohna lantir hi chhunzawm zel a la ni. Pawl hrang hrang, political party ṭhenkhat, zirlai leh women wing te chu lungawi lohna lantirtu langsar te an ni.