Assam Minister-in National Park leh Sanctuary tlawh

Assam Forest Minister Pramila Rani Brahma chuan nimin khan state chhunga National Park leh Sanctuary ṭhenkhat te a tlawh a, June 1-a Assembly session neih turah hemi chungchang hi sawichhuah a tum thu a sawi.

The Assam Tribune-in a kawmnaah, Brahma chuan, "Assam mipuite chu National Park leh Sanctuary venhim kawngah ṭanrual a ngai tak zet a ni, a bikin Rhino te hi kan humhalh a ngai tak zet a ni" a ti. Assam Forest Minister chuan Assembly session neih zawh a nih hnuah Kaziranga National Park tlawh a tum thu sawiin, a hmun ngeiah hun rei vak lo chhung riah chilha hnathawktute hmalakna enpui a tum thu a sawi.

Brahma chuan Forest Department hna thawkte chu an harsatna tawh te sawipui a, a sut kian dan ngaihtuahpui a tum tih a sawi. Kaziranga National Park hnaiha thingtlang khaw mi leh sa te chu sapeltute nen hian eng emaw thawh dunna an neih a rin thu sawiin, heng laia mi te hnenah hian awareness campaign neih a ṭul thu sawiin, titipui a tum thu a sawi bawk. Brahma chuan zawhna changin, "Tunah dinhmunah Kaziranga National Park veng him tur huian Special rhino protection force din a ni a, an ni tichak tur hian hmalak a ni ang" a ti.

Manas National Park chungchang sawiin, Forest Minister chuan, infra­structure lamah hmalak a ngai a ni a ti a, inthlan zawh a nih veleh khan a hmunah kalin a enfiah tawh thu a sawi. Manas National Park tihchangtlun nan hian nasa taka hmalak a ngaih thu sawiin, hnathawktute pawh an inthlahdah deuh nia a hriat thu a sawi bawk. State sorkar chuan Manas National Park tih changtlun nan hian Bodoland Territorial Council (BTC) te thawhpui turin hma a la mek a ni, a ti. Heng bakah hian state chhunga National Park leh sanctuary te venhim leh tihchangtlun kawngah sorkar chuan hma a la mek a ni tiin, Forest Minister chuan rawmngaw humhalh a ṭul tak zet a, thing phun uar deuh deuh a ṭul tih a sawi bawk.